Xəbər verdiyimiz kimi, Rusiyanın Yekaterinburq şəhərində hüquq-mühafizə orqanları tərəfindən saxlanılan azərbaycanlıların məhkəmə prosesi başlayıb.

2000-ci illərin əvvələrində törədilmiş cinayət işində şübhəli bilinərək bu ilin iyunun 27-də zor tətbiq edilərək saxlanılan 9 nəfər azərbaycanlı məhkəmə qarşısına çıxarılıb.

Məhkəmə azərbaycanlılar barəsində həbs qətimkan tədbirinin seçilməsinə baxır.

Yekaterinburqun Leninski Məhkəməsində keçirilən prosesdə bir neçə qətldə və adam öldürməyə cəhddə şübhəli bilinərək saxlanılan azərbaycanlılar barəsində həbs-qətimkan tədbirinin seçilib-seçilməməsi müəyyən ediləcək.

“Cebheinfo.az” xəbər verir ki, ittiham tərəfi Məzahir Səfərovun barəsində həbs qətimkan tədbiri seçilməsini tələb edir.

Vəkil müdafiə etdiyi şəxsin ev dustaqlığına buraxılmasını istəyib. Məzahir Səfərov vəkilinə bildirib ki, etirafı zorla alınıb, ailəsi hədələnib.

Məhkəmə qapalı keçirilir. Prokurorluq bunu tələb edib. Media nümayəndələri məhkəmə zalından çıxarılıb.

Saxlanılan azərbaycanlıların hər biri barəsində həbs qətimkan tədbirinin seçilməsi məsələsinə ayrıca baxılır.

Məlumat üçün bildirək ki, Rusiya İstintaq Komitəsinin Sverdlovsk vilayəti üzrə Regional İdarəsinin açıqladığı məlumata görə, azərbaycanlılara qarşı ittihamların irəli sürüldüyü epizodlar Yekaterinburqda 2001, 2010 və 2011-ci illərdə baş verib.

Qeyd edək ki, iyunun 27-də səhər saatlarında Yekaterinburqda azərbaycanlıların yaşadığı 10-dan çox mənzildə əməliyyat keçirilib. Əslən Ağdamdan olan Səfərovlar ailəsinin əksər üzvləri tutulub. Əməliyyat zamanı iki qardaş - Ziyəddin və Hüseyn Səfərovlar öldürülüb, xeyli azərbaycanlı saxlanılıb. Bir neçə nəfər xəstəxanaya yerləşdirilib.

Xəzər
“Cebheinfo.az”