Qazaxıstan Prezidenti Kasım-Jomart Tokayev, ölkədə üzü tamamilə örtən geyimlərin istifadəsini qadağan edən fərman imzalayıb.

"Cebheinfo.az" xəbər verir ki, bu qərarla birlikdə Qazaxıstan, artıq Qırğızıstan, Tacikistan və Özbəkistandan sonra Mərkəzi Asiyada bu cür üz örtüyü qadağası tətbiq edən dördüncü ölkə olub.

Yeni qaydalara əsasən, niqab, burqa və s. üzü tam örtən geyimlərin ictimai yerlərdə istifadəsinə icazə verilməyəcək.

Lakin bəzi hallarda istisnalar tətbiq olunacaq:

- Peşə tələbləri (yanğınsöndürən maskaları, cərrahi maskalar və s.)
- Tibbi səbəblər
- Pis hava şəraitindən qorunma
- Mülki müdafiə tədbirləri
- Mədəni tədbirlər çərçivəsində

Rəsmi açıqlamalarda bu qərarın məqsədinin radikal İslamçı qruplarla mübarizə olduğu vurğulanıb. 

Hakimiyyət nümayəndələri bildiriblər ki, niqab kimi geyim formalarının ənənəvi Qazax İslam anlayışında yeri yoxdur və bu praktikaların bölgədə xarici mənşəli radikal ideologiyalardan qaynaqlandığı qeyd edilib.

Bu addım, Qazaxıstanın və digər Orta Asiya ölkələrinin son illərdə getdikcə daha çox laiklik və milli təhlükəsizlik siyasətlərini tətbiq etməsinin bir hissəsi kimi qiymətləndirilir.

Qonşu ölkələrdə də analoji qadağaların ictimai təhlükəsizliyi təmin etmək və radikal dini təsirlərin yayılmasının qarşısını almaq məqsədilə tətbiq olunduğu bilinir.

Nigar Hacılı
"Cebheinfo.az"