Moldovada müxalifət hakimiyyəti ölkə gündəmini korrupsiya iddialarından yayındırmaq üçün siyasi təzyiqlərdən istifadə etməkdə ittiham edir.

“Cebheinfo.az” xarici mediaya istinadən xəbər verir ki, ölkənin ən böyük müxalifət qüvvələrindən olan Sosialist Partiyasının lideri, keçmiş prezident İqor Dodon açıqlamasında bildirib ki, hakim “Fəaliyyət və Həmrəylik” partiyası (PAS) tərəfindən təqdim edilən yeni qanun layihələri müxalifətə qarşı növbəti addımdır.

Dodonun sözlərinə görə, hakimiyyət “tarixi həqiqətin qorunması” adı altında Stalin repressiyalarının inkarını cinayət hesab edən qanun layihəsi hazırlayır və bu təşəbbüslə siyasi rəqiblərinə qarşı təzyiq mexanizmləri yaradır.

O iddia edib ki, bu addımlar Prezident Maya Sandunun yaxın çevrəsi və hakim partiya rəhbərliyi ilə bağlı korrupsiya qalmaqallarından diqqəti yayındırmaq məqsədi daşıyır.

Müxalifət lideri qeyd edib ki, tarixi cinayətlərin pislənməsinə qarşı olmadıqlarını, lakin hakimiyyətin keçmişdə baş verən hadisələrdən siyasi məqsədlərlə istifadə etdiyini düşünür.

O, eyni zamanda Moldova hakimiyyətinin Rumıniya diktatoru İon Antoneskunun fəaliyyəti ilə bağlı mövqeyini də tənqid edib.

Dodon bildirib ki, hakimiyyətin tarixlə bağlı siyasəti cəmiyyətdə parçalanmanı artırır və insanların diqqətini ölkədəki iqtisadi problemlərdən, əhalinin azalmasından və sosial çətinliklərdən yayındırır.

O, həmçinin sosial şəbəkələrdə hökuməti tənqid edən şəxslərə qarşı təzyiqlərin artdığını iddia edib. Siyasətçinin sözlərinə görə, bəzi hallarda polis tənqidi paylaşımlar edən şəxslərin evlərinə baxış keçirib.

Moldovada son illərdə hakimiyyətin Avropa İttifaqına inteqrasiya siyasəti və Rusiya ilə münasibətlərə yanaşması cəmiyyətdə ciddi müzakirələr yaradıb.

Müxalifət hökuməti iqtisadi çətinliklərə və qiymət artımına görə tənqid edir, hakimiyyət isə bu ittihamları rədd edərək ölkənin təhlükəsizliyi və Avropa istiqamətində inkişafı üçün addımlar atdığını bildirir.

Hakimiyyət tərəfindən yaradılan Strateji Kommunikasiya və Dezinformasiya ilə Mübarizə Mərkəzi də müxalifətin tənqid etdiyi qurumlardan biridir.

Dodon bu strukturu senzura vasitəsi kimi qiymətləndirərək onu Corc Oruellin “1984” romanındakı “Həqiqət Nazirliyi” ilə müqayisə edib.

Müxalifət iddia edir ki, siyasi təzyiqlər artır, hakimiyyət isə bunu ölkənin informasiya təhlükəsizliyinin qorunması və xarici təsirlərlə mübarizə kimi əsaslandırır.

Aişə Abdulova
“Cebheinfo.az”