İran İslam İnqilabı Keşikçiləri Korpusu (SEPAH) qüvvələri noyabr ayından bəri ölkənin cənub-şərqindəki Sistan və Bəllucistan əyalətində antiterror əməliyyatları zamanı 150 yaraqlını həbs edib və 100 nəfəri isə öldürüb.

“Cebheinfo.az” xəbər verir ki, İran İslam İnqilabı Keşikçiləri Korpusunun Quru Qoşunlarının komandanı briqada generalı Məhəmməd Pakpur 6 aprel 2024-cü ildə Sistan, Bəllucistan və Raskda baş vermiş insidentdə həlak olan təhlükəsizlik qüvvələrinin anım mərasimində belə deyib.

2024-cü ilin aprelində Raskda və Çabaharda baş vermiş hücumlara toxunan Pakpur deyib:

“Bu əməliyyatlarda öldürülən 18 terrorçunun hamısı yerli yanacaq qaçaqmalçıları qiyafəsində olan əcnəbilərdir. Onlar silahları yanacaq qablarında gizlətmişdilər”.

O, yerli sakinləri ayıq-sayıq olmağa və əcnəbilərin yerli sakinlər kimi görünməsinə imkan verməməyə çağırıb.General Qoarkuhdakı başqa bir hadisəyə də toxunaraq deyib: 

“Hücumdan sonra təhlükəsizlik əməliyyatlarımız zamanı 150-dən çox yaraqlı həbs olunub və 100-dən çox terrorçu isə öldürülüb”.

Məhəmməd Pakpurun sözlərinə görə, saxlanılanlar onlara xaricdə hökumət əleyhinə qüvvələrə qoşulmuş Raskdan qaçan şəxsin rəhbərlik etdiyini etiraf ediblər.

Pakpur sakinləri bu cür insanların təsirinə düşməməyə, evlərini regional təhlükəsizliyə və inkişafa xələl gətirə biləcək yad şəxslərə icarəyə verməməyə çağırıb.

Müşfiq Abdulla 
“Cebheinfo.az”