“Rusiya Prezidenti Vladimir Putinin ABŞ-də keçiriləcək G20 sammitində iştirakı ilə bağlı qərar hələ verilməyib”.

"Cebheinfo.az" xəbər verir ki, bunu TASS-a Rusiyanın G20 üzrə nümayəndəsi Denis Aqafonov deyib.

Onun sözlərinə görə, Rusiya tərəfi ABŞ rəsmilərinin Vladimir Putini G20 liderlərinin görüşünə dəvət etmək niyyəti ilə bağlı əvvəllər verdiyi açıqlamalardan xəbərdardır.

Denis Aqafonov qeyd edib ki, dövlət başçılarının iştirakı üçün dəvətnamələrin verilməsi və əlaqələndirilməsi də daxil olmaqla diplomatik prosedurlara əməl olunmalıdır.

O, bu cür məsələlərin daxili diplomatik iş kateqoriyasına aid olduğunu və ənənəvi olaraq ictimai müzakirə mövzusu olmadığını vurğulayıb.

Nəşrin məlumatına görə, Rusiya bu məsələlərdə məxfilik prinsipinə riayət edir, ona görə də prosesin praktik aspektləri ixtisaslaşmış diplomatlar tərəfindən idarə olunur.

Xatırladaq ki, aprelin sonlarında “The Washington Post” ABŞ Dövlət Departamentindəki mənbələrə istinadən xəbər verib ki, ABŞ Prezidenti Donald Tramp Vladimir Putini dekabrın 14–15-də Floridanın Mayami şəhəri yaxınlığındakı Doralda keçirilməsi nəzərdə tutulan G20 sammitinə dəvət etmək niyyətindədir.

Daha sonra Amerika lideri jurnalistlərə bildirib ki, onun fikrincə, Rusiya Prezidentinin bu görüşdə mümkün iştirakı faydalı olardı.

Əhməd
“Cebheinfo.az”