“Rusiya güzəştə getmir, yalnız bir tələb var”. 

“Cebheinfo.az”-ın məlumatına görə, “Hraparak” qəzeti Ermənistanın Baş naziri Nikol Paşinyanın Rusiyaya səfərinin nəticələrini şərh edərkən belə yazıb. 

Nəşr qeyd edir ki, Paşinyan Moskva ilə yaranmış problemləri həll etmək ümidilə Rusiyaya səfər etsə də, heç bir razılaşma əldə olunmayıb. Rusiya hakimiyyəti Paşinyandan Zəngəzur dəhlizindən imtina etməyi tələb edib. 

“Hökumət dairələrində pərdəarxası Nikol Paşinyanın Rusiyaya səfəri narahatlıqla müzakirə olunur. İyulun 6-da Yekaterinburqda keçirilən beynəlxalq sənaye sərgisində iştirak etmək üçün yola düşən və əldə etdiyimiz məlumata görə, səfərin təşəbbüskarı olan Nikol Paşinyan Moskvanı inandıra və ixrac məsələsini həll etmək üçün verdiyi açıq vədi yerinə yetirə bilməyib.

Xatırladaq ki, seçkilərdən əvvəl o, cəsarətlə Moskvaya gedəcəyinə və bütün məsələlərin bir neçə gün ərzində öz yerini tapacağına söz vermişdi. Paşinyan Moskvaya getdi, lakin heç bir məsələ, xüsusən də ixracla bağlı məsələlər həll olunmadı. 

Rusiya tərəfi onu soyuqqanlılıqla dinlədi və əvvəlki cavabları təkrarladı: məhsullarınız bizim bazarımıza uyğun gəlmir. Bu arada, əslində Paşinyanın Rusiya ilə AB arasında dəqiq seçim etməsi üçün təzyiq altında olduğu aydındır. 

Onlar hətta Samvel Karapetyan və Qaqik Tsarukyanın taleyi ilə də maraqlanmırlar. Tələb birdir, TRIPP-dən imtina etmək və Avropa İttifaqı ilə oyun oynamamaq”,-deyə “Hraparak” qeyd edir.

Müşfiq Abdulla 
“Cebheinfo.az”