Psixoloji stress beyin, bağırsaq və sümük iliyi arasındakı mürəkkəb qarşılıqlı təsir zənciri vasitəsilə qan kök hüceyrələrinin funksiyasına təsir göstərə bilər.

"Cebheinfo.az" xəbər verir ki, bunu yeni tədqiqatı göstərib.

Alimlər xroniki stressin immun sisteminə necə təsir etdiyini anlamaq üçün siçan modelindən istifadə ediblər. Tədqiqatın aparıcı müəllifi, Sun Yat-sen Universitetinin professoru Menq Çjao qeyd edib ki, bu fikir uzun müddətli stress zamanı insanların soyuqdəymə kimi xəstəliklərə daha çox həssas olduqları müşahidəsindən irəli gəlib.

Tədqiqatda stressin hematopoetik kök hüceyrələrin özünü bərpa etmə qabiliyyətini pozduğu və immun sisteminin vacib hüceyrələri olan limfositlərin istehsalını azaltdığı aşkar edilib.

Bundan əlavə, alimlər gözlənilməz bir təsir zəncirini aşkar ediblər: stress zamanı beyin bağırsağa təsir edən simpatik sinir sistemini aktivləşdirir. Bu, mikrofloranın tərkibini dəyişdirir və qocalmanı yavaşlatmaq və hüceyrə sağlamlığını qorumaqla əlaqəli olan spermindin də daxil olmaqla faydalı metabolitlərin səviyyəsini azaldır.

Nəticədə kök hüceyrələr normal olaraq hematopoezi və immun funksiyasını dəstəkləmək qabiliyyətini itirirlər.

Tədqiqatçılar, həmçinin xroniki stressin stress reaksiyası ilə əlaqəli müəyyən beyin bölgələrinin fəaliyyətini azaltdığını aşkar ediblər. Siçanlarda bu bölgələrin basdırılması immun sistemində oxşar pozuntulara səbəb olub.

Müəlliflər bunun müəyyən beyin bölgələrinin sümük iliyi kök hüceyrə funksiyasını tənzimləməyə qadir olduğuna dair ilk birbaşa dəlil ola biləcəyini deyirlər.

Tədqiqatda iştirak etməyən mütəxəssislər nəticələri vacib adlandırsalar da, bunların yalnız heyvanlar üzərində aparılan tədqiqatlar olduğunu və bu mexanizmin insanlarda tam şəkildə fəaliyyət göstərib-göstərmədiyinin məlum olmadığını vurğulayırlar.

Alimlər oxşar "beyin-bağırsaq-sümük iliyi oxu"nun insanlarda olub-olmadığını və bunun yaşlanma, xərçəng və digər xroniki xəstəliklərlə əlaqəli olub-olmadığını yoxlamağı planlaşdırırlar.

Xəzər

"Cebheinfo.az"