Yaxın vaxtlarda yalnız hakim “Vətəndaş Müqaviləsi” Partiyasında kadr dəyişikliyi deyil, həm də hökumətin tərkibində dəyişikliklər gözlənilir. 

“Cebheinfo.az”-ın məlumatına görə, bu barədə “Johovurd” qəzeti yazıb.

“Eyni mənbələrə görə, Ermənistanın Baş naziri Nikol Paşinyan bütün idarələrdə əhəmiyyətli yeniləmələr həyata keçirmək qərarına gəlib. Yayılan məlumatlara görə, son həftələr hökumətin tabeliyindəki qurumlarda vəziyyət son dərəcə gərgindir. Müxtəlif strukturlarda irimiqyaslı yoxlamalar aparılır. Çoxsaylı sənədlər tələb olunur. 

Mənbələrimizin bildirdiyinə görə, dosyelər toplanaraq şəxsən Paşinyana təhvil verilir. Dövlət orqanlarında xüsusi ehtiyatlılıq müşahidə olunur. Çoxsaylı işçilərə sənədlərini qaydasına salmaq və sürprizlərə hazır olmaları üçün müxtəlif şöbələrdən zənglər gəlir. 

Əldə olunan məlumata görə, bu nəzarət əməliyyatı İrəvanın inzibati rayonlarını da əhatə edir. Baş nazir artıq komanda yoldaşlarına prosedurlara ciddi əməl etmək və xüsusi sayıqlıq nümayiş etdirməyin vacibliyi ilə bağlı açıq şəkildə xəbərdarlıq edib.

Hakimiyyətyönlü dairələrdən gələn xəbərlər göstərir ki, Paşinyan inzibati rayonlarda formalaşan ciddi korrupsiya sxemləri ilə bağlı xəbərdarlıqlar alıb. Ona görə də orada gərginlik hiss olunur.

Bu genişmiqyaslı “təmizləmə”nin nə qədər uzağa gedəcəyi və hədəfin kim olduğu hələ bəlli deyil. Ancaq fakt budur ki, Baş nazir idarəetmə rıçaqlarından istifadə etməklə və komandada “təmizləmə” aparmaqda ciddidir”, - deyə “Johovurd” qeyd edir. 

Müşfiq Abdulla 
“Cebheinfo.az”