İran Mərkəzi Bankının verdiyi açıqlamaya görə, Rusiyanın milli ödəniş sistemi olan “Mir” artıq İranda istifadəyə verilib.

"Cebheinfo.az" xəbər verir ki, bu inkişafla rusiyalı turistlər və iş adamları İranda NFC texnologiyası ilə əlaqə ödənişləri edə və “Mir Pay” tətbiqi ilə əməliyyatlar həyata keçirə biləcəklər.

Bankın açıqlamasında "NFC ödənişləri artıq İran ödəniş şəbəkəsində mümkündür. Ödənişlər kiçik alışlar üçün PİN kodu daxil edilmədən həyata keçirilə bilər. Bu funksiyadan Şetab və Mir ödəniş sistemlərinin inteqrasiyası çərçivəsində “Mir Pay” tətbiqi vasitəsilə də istifadə etmək olar" deyə bildirilib.

Bu addım Rusiya və İran arasında ödəniş sistemlərinin inteqrasiyası prosesinin ikinci mərhələsidir.Səlahiyyətlilər deyirlər ki, növbəti mərhələ iranlıların Rusiyada Şetab kartlarından istifadə etməsinə icazə verilməsi olacaq.

İki ölkə arasında bu maliyyə əməkdaşlığı Qərbin sanksiyalarına məruz qalan Rusiya və İranın qlobal maliyyə sisteminə alternativ yollar axtarmasının nəticəsi kimi dəyərləndirilir.

Ekspertlər bildirirlər ki, bu cür əməkdaşlıq sanksiyaların təsirinin azaldılmasında mühüm rol oynaya bilər.

Nigar Hacılı 
"Cebheinfo.az"