Milli Məclisdə vitse-spiker Ziyafət Əsgərov Fazil Mustafanın qanunsuz sahibkarlıqla bağlı təklifinə etiraz edib.

"Cebheinfo.az" xəbər verir ki, bu barədə Milli Məclisin bugünkü plenar iclasında Cinayət Məcəlləsində, Cinayət-Prosessual Məcəlləsində və "İnformasiya, informasiyalaşdırma və informasiyanın mühafizəsi haqqında" qanuna dəyişikliklərin müzakirəsi zamanı çıxışında bildirib.

Vitse-spiker deyib ki, cinayət qanunvericiliyində bütün qanunsuz sahibkarlıq formalarını eyni ad altında birləşdirmək düzgün yanaşma deyil.

Onun sözlərinə görə, müxtəlif hüquqpozmalar fərqli hüquqi mahiyyət daşıyır və hər birinin ictimai təhlükəlilik dərəcəsi ayrıdır.

"Bir əməl fırıldaqçılıqdır, digəri aldatmadır, başqası etibardan sui-istifadədir. Bunların hamısını "qanunsuz sahibkarlıq" adı altında toplamaq doğru deyil. Hər törədilən cinayətin öz ictimai təhlükəlilik dərəcəsi var və məsuliyyət də buna uyğun müəyyənləşdirilir", – deyə vitse-spiker vurğulayıb.

"Cebheinfo.az"